2008 北京遊 - 第六天

第六天︰今日4點機返香港，朝早搵咗間老上海城隍廟小吃店食早餐，小籠包、麵條，普普通通，都食咗二十幾蚊，北京王府井附近的消費真係好高。阿仔話成日打的，不如搭地鐵啦，咁我地又走去灯市口站搭地鐵去鼓樓，連埋轉線同搵路，成個鐘頭先搵到鐘樓，行完條又長又斜既樓梯，又從高處睇吓北京皇城，已經唔夠時間去恭王府，打的去天安門，沿途見到國家劇院，叫司機停車，又到此一遊。之後再遊天安門廣場、午門等地方，早上的天安門跟黃昏的又不一樣。影完相快快手去家鄉雞食晏，食完返酒店攞行李check-out，拜拜

 

鼓樓附近胡同

 

 

鐘鼓樓區的三輪車

 

 

鐘樓

 

 

 

從鐘樓眺望皇城

 

 

天安門廣場

 

 

 

 

 

 

 

午門

 

2008 北京遊 - 第五天

第五天︰朝早在麥當勞食完早餐，在王府井附近逛逛，碰上東教堂，當然要參觀參觀。

 

 

再到灯市口站搭地鐵去天壇。順帶到紅橋市場行吓，紅橋市場相等於深圳的羅湖商業城，身為廣東人的我當然冇幫襯啦。跟住過天橋對面的天壇東門進入天壇。從東門入天壇首先見到很多市民進行各式各樣的活動︰跳舞、體操、捉棋、打球。老爺話北京的退休人士好幸福，可以買全年公園票入公園玩，進行各項活動又不用花錢，所有人都是自發性，每個人的面人都是歡欣的表情。我哋從中軸線開始遊天壇，從祈年殿到回音壁，又一次見到皇城的歷史。到中午，從北門轉右往前走，終於搵到老北京炸醬麵的老店，一進門，店小二用舊有的腔調招呼客人，很有氣氛。雖然我們不喜歡北方炸醬麵的味道，但值得嘗試。

 

天壇

 

 

 

 

 

 

祈年殿

 

 

祈年殿內

 

 

 

回音壁

 

 

回音壁內殿

 

 

 

 

食飽飽之後，打的往潘家園旧舊市場，在這個放大了的摩囉街逛了一個多鐘頭，東摸摸、西看看，又買了一啲石頭手信。繼續下一個行程 - 大柵欄，此處是很多有名的店鋪的發源地，第一家電影院現時仍然在播放電影。店鋪前亦有寫上有關的歷史，在這裡令我聯想起杭州的清河坊，但清河坊管理較完善，而大柵欄則予人雜亂無章的感覺。我哋選擇 "狗不理" 為今晚晚飯的地方，60元/位的包子套餐包括6個小包及一碗小小的綠豆粥，一點都不好吃。再叫小菜，竟然冇米飯，服務員話只有包子，咁饅頭都好啦，吓！饅頭都冇？只有有饀包。唉！仲要食嗰啲難食既有饀包？惟有匆匆吃完小菜，再找超級市場，入貨返酒店。

 

 

 

 

 

 

 

 

 

2008 北京遊 - 第四天之二

離開八達嶺既時候，原來打算在八達嶺的北京炸醬麵(長城店)食午飯，然後出發到定陵。不過師傅話長城的飯店都是砍人的，很貴，要食炸醬麵就留返去天壇附近既北京炸醬麵老店食，佢仲介紹我哋到定陵的餐廳午膳，因為那兒是國營飯店，不會亂收費的。就這樣，我哋就幫襯咗呢間飯店啦，好多年冇幫襯過國營飯店，啲食物不過不失，價錢亦中規中矩。遊完定陵，師傅載我哋去公路影水立方和鳥巢。因為暫時兩個場地都未開放，四周仲係地盆，啲人影相就咁企起條路度，新聞都有報導過呢個奇景。影完相返酒店上網online check-in 後日走既機位。之前打電話去大董烤鴨訂位，服務員話一星期都冇位，打算轉全聚德，諗諗吓，咁巴閉，點都要食到你。再打電話去問︰我聽日返香港，好想食你啲鴨，可唔可以幫吓我。終於比我攞到張5:30既枱，嗱嗱聲打的去見識吓先。真係聞名不如見面，成本菜譜好似一本畫冊，每碟餸都好似一幅畫，搞到我好似食緊法國菜，味道亦唔錯，我哋好守時7:00前還枱。食飽飽打的到西單，西單相等於香港既旺角或者銅鑼灣，先到最大既書店-北京圖書店，雖然只係買咗幾本書，都留連咗成個鐘。再行去西單商場，行咗一陣，正打算買嘢，商場保安趕客，唔係嘛？8:30閉門

可能啲細商場早啲收啦。到附近大啲既商場買咗啲迷你冰煻葫蘆做手信，又買咗支紅酒同零食，返酒店lu。

 

定陵餐廳

 

 

定陵入口

 

 

 

 

 

 

明朝皇帝日常佩帶既皇冠

 

 

唔明點解啲人咁鐘意掟錢？

 

 

 

看水立方和鳥巢的公路

 

 

 

 

西單

 

 

2008 北京遊 - 第四天

第四天 - 今日係成個行程最開心既一日，亦有奇遇。今日約咗師傅去長城和定陵。師傅7:30到達和平賓館接我哋，春節的早上交通暢順，未夠9點，我哋就到達長城八達嶺纜車站。等到9:00，就坐纜車直達八達嶺好漢坡。點解咁少人既？我有冇去錯地方？因為係坐纜車關係，未到9:30已經到達好漢坡，啲人都未行到上黎，梗係少人啦。玩到10點到，都影夠相啦，但係冇理由咁早走架，見到對面另外一個山嶺，咪過去行吓囉，初時都有十個人到，嗰幾個人走埋之後，得番我地三個。老爺話︰咁難得冇人，不如擺吓post影吓相。如此這般，我地好開心咁玩咗20-30分鐘，點解仲係冇人上黎既？玩到成11點，走既時候，見到一個年青人移開入口前既一塊鐵牌比我哋離開，先發現原來呢個山頭係唔比入既，我地入黎既時候年青人未開工，但係佢一路望住我哋，並冇騷擾我哋，好有耐性咁等我哋走，可能係政府要求對遊客有禮掛。咁難得可以包起嗰長城山頭黎玩，真係令我哋畢生難忘。

長城八達嶺的索道

努力不懈的攝影師

就係呢個牌，令我們有一個難忘的奇遇。