今年花小姐早早通知五月係考期時期，加上趕 paper，好早就同花師奶食母親節飯局，早到我都唔記得咗。我同哥哥們又搵咗一日同媽媽食飯，咁就算係做完 "母親節" 要做既嘢。上星期收到花小姐打返屋企既電話，又搵老爸、又搵細佬，神神秘秘。
星期六同哥哥們和姪女們去迪士尼，突然間問哥哥，不如我地聽日同媽媽飲茶？阿哥話︰好難搵位喎。我都知呀，但唔知點解，覺得媽媽咁大年紀，有機會就同佢飲下茶啦。就係咁，促成咗幾拾年都未試過既母親節同媽媽飲茶活動
可能我媽媽都估唔到，我既轉變係見到自己個女咁緊張母親節，覺得自己一直太冷淡，先會約哥哥同媽媽在母親節正日飲茶。母親節前一日過咗十二點，花少爺就送咗女朋友幫手整既芝士蛋糕俾花師奶，又真係幾好食喎
花小姐又話星期日要返一返屋企，順便同花師奶食飯，叫咗佢唔使咁麻煩，佢又堅持咁做。尋日去哥哥嗰邊同媽媽、殷伯母、阿嫂一班媽媽飲完茶，跟住去崇光行街，大出血之後，返到屋企諗住叫外賣，最後叫咗肯德基。套餐唔算好食，但花小姐由宿舍專登返屋企食飯，之後又趕返宿舍做 Paper，花師奶反而有啲心痛，覺得太辛苦啦
原來佢專登返黎送禮物，仲有張心意卡。
其實養兒育女係天職，從來都唔期望有回報，相對地，亦從來唔會專登做啲嘢氹媽媽，總覺得為 "節日" 食飯、送禮物係門面功夫，無咩意義。但呢兩年，隨着孩子長大，佢地堅持做啲 "功夫"，花師奶想可能自己媽媽都喜歡收到我們既 "門面功夫"？估唔到，竟然係孩子改變自己既想法。或者，以後既母親節，我都應該去搵位飲茶，做下 "門面功夫"
