下週是開學的最后一週，老規矩在開學前大吃大喝一番，今晚去咗黃埔九期既竹蘆食放題。今晚亦是奧運閉幕禮，我們選擇了吃 6:00-8:00 的時段，每人承惠$162。食材新鮮，串燒的質數最高，還有羊扒、牛脷等選擇；刺身很新鮮，壽司飯略鬆散；天婦羅最遜色，皮太厚；炸物中的炸生蠔和芝麻雞翼最好食。雪糕有五款，飲品也有紅豆冰、菊花茶熱飲、汽水和啤酒等選擇。百多元的價錢，相當不賴。
雞骨腸
各式壽司
羊扒
各式炸物
刺生
紅豆冰和菊花蜜
2008年8月17日 星期日
東莞莞城旗峰山鉑爾曼酒店-3
離開酒店到附近搵食，附近有一間御元堂，再行前啲有一間甜品屋，我同老爺就食咗簡簡單單既甜品及小食，然後坐 K1到莞城東站，搭三時廿五分的大巴回皇崗，回家去也！
搭K1時路經東城十三碗，原來是偌大的一條食街，下次到莞城，定要到此一遊。
炸鮮奶 - 皮太厚
雙皮奶 - 好食
煎餃子 - 好味
骨肉相連 - 雞肉加軟骨 - 幾得意；姜汁撞奶 - 姜汁太多，有啲苦。
鹵水雞腳 - OK
東城十三碗
返屋企 LU，下次再玩過。
東莞莞城旗峰山鉑爾曼酒店-2
第二朝起身，落地下餐廳食自助餐。嘩！個自助餐真係誇張，唔怪之得訂房個姐姐話一定要食 Pullman 既自助餐。上次亞哥佢地去玩，已經話個自助餐好正，之但係估唔到，早餐竟然誇到有巴拿馬火腿，仲抵死到有人 stand by 個切片機前新鮮切出黎。
因為要游泳和玩 fitness，未敢食太多，拍照又給阻止，匆匆拍了兩張相，下次再去食過。
老爺選擇到室外泳池晒太陽，我就去咗 fitness 玩左半個鐘，啲設施好新，諗住續樣慢慢玩，點知後來又幾個男人入黎，又影相，又嘈。唉！唯有走啦。後來服務員話我知其中一個係 "明星"，係度影相
。無得做運動，咪上房換泳衣到室內泳池浸三溫暖，咁啱播緊奧運，我就係暖水池一路浸一路睇奧運。一個人包池半個鐘，有人入黎，施施上水搵老爺。
出到室外池見到老爺啱啱煎完豬扒起身，佢晒咗個幾鐘，佢話吹住風晒太陽，超正！之後上房再瞓多覺。話返轉頭，間酒店真好，我問可唔可以 late check out？櫃枱竟然話已經自動幫你做咗三點先check out。
終於 Hea 到兩點鐘，要食飯同走人返歸陪細路食晚飯。
東莞莞城旗峰山鉑爾曼酒店-1
晚上到市中心食飯，點知淨係見到 KFC、Pizza Hut、味千拉麵，唔係嘛？上大陸食呢啲嘢？終於搵到幾間食市，決定去最多人食嗰間 - 竹馨園。原來間店係食粥邊爐，但係兩支公又唔想打粥邊爐，咁就點咗幾個小菜，同一鍋白粥。之後就買咗啲零食返酒店 Hea
我們的宵夜
東莞莞城旗峰山鉑爾曼酒店
好多年無到過莞城，今次專程往莞城一遊，住莞城的Pullman，享受吓五星級的服務。上午仲要返工，放工約咗花老爺在新生餐廳食完晏，在青衣城搭車往上水港鐵站，再搭港鐵往羅湖。
過關時發現忘記帶會員證！大獲！無會員證就無咗會員優惠，相差成倍。張大陸電話咭又唔靈，好灰
過埋大陸關口，再試張電話咭又得喎。咁咪打電話到訂房中心問取消Booking，點知訂房中心話不如直接打去酒店訂房部問吓對方接唔接受無帶會員證？隨即打電話去酒店，對方話訂房時已經輸入晒所有資料，可以俾返個會員優惠，但自助餐既買一送一優惠就無啦。唉！算啦，一場上到深圳，繼續旅程啦。
在羅湖商業城的巴士站坐莞城東城的大巴到東城站，大約一小時廿分到達，即刻增值張電話。
從東城站打的往酒店，間酒店真係唔錯，真五星，唔係 "準" 五星。可惜今次咁晏先出門口，去到已經五點，加上要出去市中心食飯，坐一陣就問櫃枱點行去海雅百貨，原來一出門口右轉向前行，見到第二個紅綠燈就到，咁好啦，就行去啦。最後，行咗成廿分鐘先到。
大堂入口
大堂
房間外圍
房間走廊
房間︰得！
訂閱：
文章 (Atom)