2007 東京遊 - 5

天氣咁熱

FASTPASS又未夠鐘。唉！都唔知做咩好。咁我哋就出去舞濱駅食晏。

食完晏坐單軌車返樂園用FAST PASS玩小熊維尼，玩完啱啱好睇巡遊。

睇完巡遊我哋就離開咗樂園，去舞濱駅坐JR京葉線到海濱幕張駅既Garden Walk 幕張outlet。呢嗰 outlet最大賣點係 aguis b.，衫款會好啲，如果打算買袋就唔好有太大期望，啲袋款真係out 到呢

又冇長青款

好失意之下再上二樓行吓，見到間EDWIN，睇書話佢係日本「牛王」喎，我唔識，不過我覺得佢質地好，我家老爺試完話好着，咁就買咗兩條牛仔褲，所以唔知係咪好抵。呢度啲Nike款式及價錢都好過御殿場outlet，人流較少，所以有心機搵吓衫，都買到嘢。

不知不覺就7點鐘，要趕返迪士尼睇晚間巡遊。即刻走去幕張駅食飯再趕返酒店放低戰利品再趕去迪士尼睇巡遊。

好順利咁趕返迪士尼睇巡遊，然後再去玩多一、兩個遊戲。玩到十點鐘，迪士尼關門啦，我哋搭埋單軌車、接駁巴士返酒店。

總結今日成績︰出入咗迪士尼三次、坐咗五次單軌車、一次接駁巴士，玩咗9個遊戲、睇咗2個巡遊、1個水巡遊、1個下水禮。比我預算中，玩多咗好多。