皮蛋眼的花少爺

今日花少爺跆拳道考帶，其中包括對打環節。下午時份，收到教練電話，話花少爺被對手打爆眼角，傷口太深，要 call 白車入院縫針。

可能在學校工作時有太多經驗，竟然好鎮靜咁向教練詢問詳情，知道只是爆眼角，無有傷及眼睛，便請教練安排到急證室，然後叫醒花老爺，仲叫花老爺清醒咗，先好駕車到急證室。相差半小時左右，途中已收到花少爺口訊，話無咩事，在醫院等醫生，叫我地唔使擔心。

其實，眼角被人踢爆、道袍都血跡斑斑、仲要鏠五針，又點會唔痛？我問佢會唔會退出跆拳，或者休息一段時間，佢竟然話係自己練習不足，要加緊努力，希望下次可能順利考到升級試。

唔好以為佢閉上眼睛，呢張係佢張大眼睛的相片，成隻皮蛋咁大。

自從花少爺知道下學年要去美國做交流生，真係長大咗好多，佢今次處理得好好，仲不斷話唔好意思，麻煩咗好多人。我覺得好驕傲，佢無怨對手令佢受傷，反而檢討事件的發生，希望佢日後做人處事，都會以此為鑑，凡事要有充足準備，發生意外亦不應怨天尤人，要勇敢對面，再另謀對策。

之不過，小朋友始終係小朋友，扮完有型之後，就話好痛、又話個樣好衰，聽日都係要請假，真係讚壞咗。