長沙灣 - 大中華飯店

朋友最近買咗新相機，花師奶近日爬文又發現咗一間食羊肉煲和煲仔飯的好地方，決定撞啱個星期日，見到朋友MSN上線既話，就一齊去試食兼試機。上週日，便幫襯了這間大中華，煲仔飯果然了得，下次要約埋花老爺的兄姊再去食過，人多食一定更開心。

由於忘記拍攝門口，借 openrice 條 link 黎介紹下︰

http://www.openrice.com/restaurant/sr2.htm?shopid=18762

朋友新買部相機係 GF，花老爺話影友都會叫佢做 girl friend，機仔細細，啲鏡頭又好可愛，影出黎既效果又真係得喎，唔怪之得而家咁 hit 啦。

花老爺隨手影既傑作，得唔得呀？

當天怱怱忙忙，啲少爺小姐個個無事忙，只有四位老人家食飯，點了羊肉煲、黃鱔煲仔飯、黃金鮮尤、生炒骨，除了生炒骨略為失色外，其他幾款都好味，尤其是個煲仔飯一定係再幫襯既原因。

黃金鮮尤

羊肉煲

生炒骨

呢個要重點介紹 - 煲仔飯。煲仔飯只有三款︰羊肉、黃鱔、臘味，每款均一價八十大元，點既時候覺得好奇怪？點解咁少選擇？又無雞肉、排骨之類選擇，三款都唔係我地想揀既，但又想食煲仔飯，最後揀咗黃鱔煲仔飯。

眾所周知，靚既煲仔飯一定要即點即煲，要等幾拾分鐘先有得食。慢慢食住等，等.......等到煲仔飯到，原來仲有師傅席前表現，師傅在非常熱既煲仔飯淋上豉油和一大碟葱，然後不停快速咁撈、撈、撈......，最後......

嗱嗱嗱！變咗呢煲味道鮮甜，配料平均既黃鱔飯。黃鱔飯是五邑那邊的名菜，每次去開平雕樓影相都會食，但相對這煲又甜又好味的黃鱔飯，以後去五邑都唔再食黃鱔飯。加上師傅咁辛苦在熱辣辣的煲仔飯調味既時候，依然好好笑容回答我地問題，真係要一再稱讚。